aprendeguarani.com

Ohai: Lino Trinidad Sanabria

Petei Tuparymbami(2) yvága pegua ndaje oguahe hi’ára ha oikóta ichugui mita yvypóra(3), ha he’i ndaje upéramo Tupame:

- Oje’éningo chéve, Tupa, ko’éro ndaje nde chemondóta aiko hagua yvy apére, ha mba’éichapiko che aikóta umi yvyporakuéra ndive ko chemichietereíva gueteri. Nañe’agareko(4) kuaa mo’ainingo chejehe ijapytepekuéra.
Ha Tupa he’i chupe:

- Ani rejepy’apýtei. Heta Tuparymba apytégui aiporavóma petei oñangarekótava nderehe, nera’aromava hína amo yvýpe.

- Hákatu, eremína chéve, Tupa?: ko’a yvágapeningo che ndajapói mba’eve; aiko apurahéi ha apukamínte, ha umíva ome’ema chéve vy’apave.

- Rerekóma petei Tuparymba, che aiporavóva’ekue, oikótava ndereheve. Ha’e opurahéita ndéve ha nembopukáta mantéreiete, ha nde reñandúta pe imborayhu. Umíva umi mba’e ome’eta ndéve vy’apave.

- Ha mba’éicha aikuaáta amo yvýpe umi tekovekuéra he’íva chéve, ko che naikumbýiva(5) pe iñe’enguéra.

- Ne Tuparymba(6) he’íta ha ohendukáta ndéve umi ñe’e ipora ha hyapu he’eva, rehendu’yva gueteri mamove; tosanga(7) paveme ha kunu’urekópe nembo’éta reñe’e hagua.

- Ha mba’e ajapóta añe’eséro nendive?

- Ne Tuparymba omoita ojovái umi mokoi nde pomimi ha ohechaukáta ndéve mba’éichapa reñembo’éva’era ha upévo ikatúta reñe’e chendive.

- Ha upéi avei, Tupa, chéningo ahendúva oiha heta tekove iñañáva amo yvy ape ári. Mávapiko umívagui chepysyrota.

- Ne Tuparymba nepysyrota, ha ome’eta hekove jepeve nepysyrombotávo.

- Aiko asýtaningo vaicha chéve, ndaikatumo’avéigui ndéve rohecha.

- Ne Tuparymba nemomandu’áta mantérei cherehe ha ohechaukáta ndéve tape rejevy hagua petei ára che rendápe; ha upéi avéko che aikóta voínte nde ykére katuínte.
Upe javéningo oñandu hikuái amo yvágape petei py’aguapypave(8) ha oñehendu petei tyapu mbegue ojoguáva ñe’engururu(9) jojapápe.
Pe Tuparymbamígui oikótama hína ra’e mita yvyporara; ha ojepy’apyeterei ñe’irare Tupa omombe’u ichupe iñangarekohara réra. Ha upémaro, hesay hovárema, he’i Tupame:

- ¡Che jára, Tupa! Ko’ágaite añandu ahatamaha aína yvy apére ha ñe’ira gueteri ere chéve mba’éichapa héra pe Tuparymba oñangarekótava che rehe.
Tupa, ombohovái pahávo ichupe, he’i pe Tuparymbamíme:

- Natekotevei reikuaa katuetei héra. Nde, ndejeheguínte(10), mavave nembo’e’yre, rehenóita ichupe MAMA. Terehókatu.
Recreación en guaraní de un cuento sacro de autor anónimo.

Ñe’endy

(1) Tuparymba = Ángel
(2) Tuparymbami = Angelito
(3) Yvypóra = Moradores de la tierra
(4) Ñe’angareko = Cuidarse
(5) Naikumbýi = No entiendo
(6) Ne Tuparymba = Tu Ángel
(7) Tosanga = Paciencia
(8) Py’aguapypave = Paz profunda, infinita
(9) Ñe’engururu = Murmullo, voces inentendibles
(10) Ndejeheguínte = Por tu propia intuición

Entrevista realizada por Ayvu Marane’y al Prof. Lic. Lino Trinidad Sanabria.

Narración de la vida escolar del Prof. Trinidad en donde comenta la prohibición de hablar el Guaraní, inclusive el comentario de haber sido golpeado por hablar su lenga madre.